講真，我都唔知「美少女戰士粉紅隊」呢個名喺邊度嚟，只知道「美少女」嘅威力好勁，可以剋死中國隊！上星期仁川亞運4x100米混合泳初賽，中國第3棒嘅陸瀅犯規被取消資格，令我哋喺決賽少咗個勁敵，最終攞到銅牌，真係好邪。
我同歐鎧淳、何詩蓓同鄭莉梅一齊參加3個接力賽，每次出賽前，都會嗌「Go Hong Kong!」，後來見香港報紙用「美少女戰士」，喺混合泳接力賽前，我哋就改嗌「美少女戰士加油」，點知嗰朝中國隊DQ，到夜晚決賽我哋一班粉紅兵就贏到第3面接力銅牌，係泳隊史上最多嘅一屆，好開心。
歐鎧淳題名 自己最唔襯
其實「美少女戰士」呢個名係歐鎧淳靜雞雞改，點知俾記者喺fb睇到。我覺得4個之中自己最唔襯，一來我唔鍾意睇《美少女戰士》，二來得佢哋3個件賽衣有粉紅邊，我嗰件係藍色邊，但都想呢種精神令我哋更團結，未來好好谷起自由泳接力，衝到一個奧運席位就最好。
今次破紀錄攞到3面銅牌，我當然開心，不過都有最失禮一次，就係自己喺50米蝶泳決賽緊張到游得差過初賽，最後得第7名；我一上水俾香港電視台拉住做訪問，就開始忍唔住喊，搞到第一次喺鏡頭前喊，真失禮。
識睇，一定係睇足英台【英波Live】：
http://soccer.appledaily.com
http://bit.ly/engballlive