地產大孖沙有咩多？梗係錢多啦！好似信和置業老闆黃志祥咁，雖然香港政局不明朗，但佢繼續發揮地產大好友本色，9月初投到觀塘市區重建大型地皮，據說唔使70億，個個都話佢醒目執到平貨。到咗近日，佢連粉嶺一幅細地亦唔放過，用7.3億收歸旗下。
黃志祥嘅土地儲備大增，喺養馬方面，佢家族亦兵力強大，雖然早幾個月有幾匹「利多」系馬退役，但經過一輪補充，唔經唔覺家陣有成八匹「利多」服役。
其中告東尼馬房嘅「馬利多」，將會喺10月1號上陣，呢匹馬仍未交代，但上季兩度入Q，質素並唔差。經過一季成長，今季狀態嚟得好快，兩個禮拜前角逐泥地一哩，喺內檔不斷食沙之下，都殺入一席季軍。呢勻跑田草1600米，睇番隻馬今年一月喺三班同程，輸唔夠兩馬位，家陣喺四班跑，換上告仔愛徒蔡明紹，當然有爭勝機會。黃志祥佔領完觀塘、粉嶺之後，相信下一站就係沙田馬場。