啱啱過咗嘅周日，警方唔單止用催淚彈驅趕群眾，就連政總外嘅和平集會都要打壓，唔畀運送音響器材入去，甚至拉埋諗住親自運送器材嘅幾位立法會議員，包括白鴿黨主席卿姐，連佔中運動嘅喇叭，至今亦被警方以非法集會理由無理扣押。
但佔中三子同學聯及學民成員，噚日必須喺政總外搞記者會，宣佈之後抗爭行動；被滅聲嘅佢哋點算好？原來最後幸有白鴿黨仗義相助！
話說知道佔中要搞記招，白鴿黨即刻拍心口班喇叭，最終搵人喺太子嘅黨總部，搬咗四個流動喇叭去現場，協助佔中三子發聲；而身為秘書長嘅張賢登更親力親為，送貨之餘仲做埋音響工人，喺現場負責駁線㖭！