究竟爆冷同星期六跑馬有冇直接關係？你問我我問邊個？但世界上確係有啲組織或團體專門研究奇異事件，有啲仲有得解釋。不過馬華力覺得星期六跑馬爆冷只係巧合，但既然數據係咁，投注時不妨避重就輕。
國慶日賽事又如何？由於部分場次出馬少，估計唔會爆得去邊。方仔今季個頭開得靚，跑完九月份賽事已贏咗10W，仲要係零亞軍，即係話搏親都得手。今期鍾意佢隻「勝利大將」，啱啱上個禮拜六先跑完，今仗已經係季內第三次上陣，方仔嘅馬勤跑絕對係好現象，好似「勁綵」已係一例，所以「勝利大將」唔怕追多鋪。
上次追嘅「津津樂道」跑第四，今次再跑對手更加弱，最衰會係大熱門，今季韋達嘅大熱門都輸到人怕，買唔買大家自己度吓。反而同場「大將軍」用莫雷拉，似乎葉楚航未開糊已有啲心急，畢竟大馬房吖嘛，所以如果賠率同「津津樂道」相差太遠，不如博吓「大將軍」，單Q搭「津津樂道」。