本欄9月24日談「名氣推銷」，內有指今年的美國網球公開賽冠軍施力治嘅球衣贊助商與亞軍錦織圭同是UNIQLO，即刻有兩位讀者來電郵指出錯誤，施力治嘅贊助商係「李寧」先至啱。謹此更正，多謝Eric及Elaine。
學聯發動全港大學生在中文大學靜坐罷課之日（九月二十二日），中大百萬大道上萬頭攢動，學聯聲稱有一萬三千人參加，盛況空前，至於真正人數是否有一萬三千咁多，無第三者證實（例如鍾庭耀），信住先，曾在百萬大道搞過罷課嘅王維基就在專欄表示懷疑：百萬大道是否可以容納咁多人？
不過人數是否萬三，只係小事啫，大事係來自全港各大專院校嘅學生為了民主訴求，雲集中大，構成震撼性圖片，成為國際新聞，引起世界人士注意，學生罷課若無罷工罷市等動作配合，當權派只要冷靜應對，學生難以成事，但在香港搞罷工罷市？講笑咩，難度極高，本港工會因歷史理由，分左右兩派，演變成回歸後嘅工聯會、職工盟兩大系統，工聯會因歷史耐，有錢，組織嚴密，係當權派大擁躉，西環御用，百分之一千唔會為學聯爭取真普選而發動罷工，只靠職工盟發動，罷工難成氣候。罷市喎！零售界、街市檔販怎會睬你呀。
九二二罷課之日，另有大事發生，就是習近平在人民大會堂召見香港商界、專業界代表七十餘人，其中包括香港最有錢嘅富豪家族及大財團代表，包括埋本港少數族裔富豪嘉道理（猶太裔）與夏利萊（印度裔），中央指定由前特首董建華率領呢班大代表上京，自有深意，如果由梁振英率領，就未免太着跡嘞，況且團內還有人對梁振英「感冒」呢。主席召見，自不然係要顯示維穩重要，請佢地唔好多聲氣，支持2017年直選方案。各位大代表回港後，中環逐漸有耳語相傳，習主席有乜主要訓示，卒之聽到嘞，會上有代表講河水井水（記得以前江澤民講過河水不犯井水，井水不要搞河水）論。散會之時，習主席與發言富豪握手，笑言：「現在不講河水井水，而是講主流分流！」（大意如此，非原文逐字逐句）。言者有心，聽者有意，大家明白啦！