【本報訊】警隊高層錯判和平佔中的最新形勢，出動防暴隊施以催淚彈攻勢，不但未能成功驅散示威者，而且遭到社會強烈譴責，激發更加多人參與佔中，同時亦嚴重打擊警隊聲譽。有警方佔中部隊人員直言，對警隊高層今次表現感到失望及不滿，形容現時警隊內部的士氣跌至「谷底」。
不少人「直踩」逾30小時
消息指出，警方計劃佔中策略，由速戰速決改為長期抗戰，佔中部隊人員已經被通知，取消休假至本周六，部份警署助理亦被要求返工至下月6日，意味警方估計佔中行動或會最少持續至本周六。
不過，為應付提早佔中，全港2.8萬名警務人員已於上周六起全部取消休假，不少警員要「直踩」30多個小時，甚至有前線人員在過去三日休息時間合共不足8小時，「真係身心俱疲，支持唔到」。
部份參與佔中行動的前線警員更加表示現時警隊的士氣非常低落，原因與警隊高層在處理佔中部署中出現連番失誤有關，「班高層一心諗住佔中市民會乖乖咁坐喺地下，然後等警方抬走，根本冇諗過佔中會咁樣發生，更加冇諗過會有幾萬人參加」。
前線人員另一不滿的是，前晚防暴隊發放催淚彈，曾成功將佔據金鐘海富中心對出的夏慤道的群眾驅散，只要警方一鼓作氣，繼續發放催淚彈狂攻，必定成功驅散示威者離關現場，但警隊高層卻突然叫停，「我哋當時已經重奪海富對出嘅馬路，班佔領嘅青年都同我哋講，如果警方繼續推進發放催淚彈，佢哋實會撤離，點知（警察）總部竟然叫停止前進，淨係叫我哋留守喺嗰度，結果示威者又好快衝番過嚟，白費工夫，令人氣餒」。
有前線人員更質疑警隊高層只重視特首梁振英安危，置其他市民的利益不顧，「有夥計噚晚（前晚）返去灣仔總部攞嘢，再去金鐘增援，點知總部出面馬路已經被示威者佔領，返唔到出去，上頭竟然話咁就算，留喺總部，班高層好似淨係掛住特首辦嘅安全，對其他被佔領嘅地方就放軟晒手腳。」