港滙跌至7.76水平，加上佔中不明朗因素，港股已進入易跌難升階段，短炒只可以細細注兼轉身夠快，唔夠貼市嘅戰友，盡量不要火中取栗，候低撈實力股反而更可取，今日推介嘅億和（838），就係一個好選擇。
1.7元撈勝算高
有跟開本欄嘅戰友，都知道唐牛已多次建議買入億和，不如快快入正題，講下公司最新動向。管理層表示，公司近年拓展嘅汽車及高端電子消費品，經過過咗投資高峯，正式進入收成期，配合原有辦公室自動化設備業務，盈利將由三頭馬車全線驅動。嘩！辦公室設備原本佔公司盈利七成，已經足夠翻身，嚟緊日子業績增長肯定爆晒燈。券商麥格理喺億和放榜後立即出report，預計2014年起三年盈利將達2.7億、3.6億及5.3億銀，現價計市盈率得單位數，吸引到痹，難怪該行大幅調高目標價至2.9元，潛在升幅54%。值得留意嘅係，億和近期每次大調整，1.7元呢個價位都守得好穩，噚日亦唔例外，戰友可以此作恐慌性吸納水平，贏面極大。
P.S. 佔中行動升級，港股喪插449點，死守牛熊線。有戰友問，唐牛有冇輸錢？梗係有！仲係四條九千足純金嗰隻。肉痛嗎？荷包損傷絕對比不上心靈創傷--面對手無寸鐵嘅市民，警方竟無理施放催淚彈，無理至極，689繼續龜縮冷氣房讀稿，可恥！佔中遍地開花，嚟緊兩日假期，請大家一齊上街聲援學生，話畀689知，邊個先係沉默嘅大多數！
唐牛
https://www.facebook.com/tongcow88