老實說，噚日都冇乜心情睇股票。我相信普遍炒股的人就算再銅臭，都會有良知。星期日87枚催淚彈，徹底傷盡香港人心。
我唔理你支唔支持佔中，總之警方搶走人把遮然後兜面噴，甚至偷襲一個本來已背對住警察嘅人，用催淚彈對付手無寸鐵嘅學生，種種行為根本係暴力行為，要對錯的話，根本已超越政治立場既討論。
佔中係直接影響金融界人士，但928那天，就有banker朋友拎埋車仔，幫手搬物資去各個物資站，佢哋話：「我唔想過咗30年後回頭一望，會因為今日冇行出去而後悔。」所以就做自己覺得應該做的事。
港股噚日大跌近500點，但千萬唔好自亂陣腳。長假在即，資金短暫撤退減低風險，但個股仍然可以有肉食。
諷刺嘅係，在「遮打革命」下，軍工航天股噚日逆市炒高，炒嘅離不開重組概念。航天控股（031）半年業績，盈利倒退76%，主要係因為今年冇非經常性收益入賬；睇埋期內收入升8.9%，毛利率亦由20.46%升至21.75%，估計核心盈利唔差。
航天控股PB 0.75倍，PE 5.75倍，比中航工業（232）、中航國際（161）都抵。而家炒緊嘅係，全個行業重組。航天控股噚日低開後，有力炒上去最多8%，雖然後來曾再跌過，但收市前再拗腰，證明有資金撐住隻股，可以一博。
Fifi
http://www.facebook.com/lovefrystock
本欄逢周二、四刊出