佔中成為全城話題，新地（016）噚日宣傳年底跑樓梯比賽，亦不忘講吓佔中。新地公關就話，佢哋員工返工未受影響，仲話如果有員工請假，公司會體諒同埋配合，目前公司亦未聽聞有員工發起罷工，暫時都睇唔到要擔憂喎，就算要罷工，公司亦都有內部應對方案。
環球貿易廣場（ICC）垂直馬拉松賽事，今年係第三年舉行，首年老闆郭炳聯帶頭起步，hea行咗一層咁大把，去年郭炳江同炳聯認真玩，一齊用半粒鐘就跑上ICC 100樓，不過近月與許仕仁官司未完，所以被問到兩位老闆會否參賽，公關都不敢回答，亦未知新地「樓神」雷霆、董事陳國威會否再次報名登「梯」。
今年12月ICC跑樓梯賽事，現正接受報名，活動會幫公益金籌款，用嚟推動青少年服務。比賽要鬥快跑上100樓合共2,120級樓梯。
新地請了專家教路，話要跑得健康，參加者不妨做多啲大腿蹲坐訓練，鍛煉吓肌肉，有意參賽既人士不妨留意吓啦！