中環在線:李小加孻女問佔中 - 李華華

中環在線:李小加孻女問佔中 - 李華華

佔中遍地開花,唔知有幾多人估到可以發展到咁嘅地步,作為父母真係要好好珍惜呢個機會同仔女探討吓香港嘅政治問題,好似港交所(388)行政總裁李小加咁,作為三個仔女父親嘅佢,有兩位已經往美國讀書,但都話佢位12歲嘅孻女睇到傳媒報道佔中嘅新聞,都問咗佢好多問題。
小加話,囡囡嘅思想雖然未係好成熟,但都同佢傾咗好多。小加早年做過記者,華華相信佢都熱血過,難怪佢話,大家都年輕過、理想過,亦都因為理想達唔到憤怒過、抗議過,真心相信呢兩日佔中嘅參與者出發點都係為香港好、為香港更加開放咁話。
至於好多人都認為警方對住手無寸鐵嘅市民出動到催淚彈太過暴力,小加就話自己對事件有好清晰嘅想法,不過「自己想法,留給自己吧!」,畢竟他只係港交所嘅CEO,評論咁敏感嘅政治事件,佢份人工應該無包。