瘦田無人耕，耕開有人爭！今年初4部華語賀歲片《金雞SSS》、《賭城風雲》、《西遊記之大鬧天宮》同《六福喜事》票房總結超過1.1億港元，唔少電影公司又燃點起拍賀歲片嘅信心。
明年除咗王晶嘅《賭城風雲2》，成龍嘅《天降雄師》，黃百鳴就唔拍喜事系列，改拍《浮華宴》，部戲係改編自英國舞台劇《不速之客》，而吳君如玩完《金雞》，今次改以《金鴨》迎歲。
放棄內地市場
幾部賀歲片之中就只有君如嘅《金鴨》放棄內地市場，監製兼主演嘅君如打算喺中港台韓日泰搵13位男星演金鴨。君如日前同馮仁昭講：「人哋有金陵13釵，我就有金陵13鴨，今次希望會有一個全新組合出現，𠵱家演員未完全定實，總之會令大家有驚喜啦！謝賢、Joe Junior同胡楓真係會搵做老鴨，唔係講笑，咁古仔（古天樂）、樂仔（余文樂）同鄭中基係鐵腳，嫩鴨想搵韓國偶像嚟演。」
撰文：馮仁昭
