南華噚日以全新姿態亮相港超聯，作客和富大埔應該被睇高一線，頭20分鐘更控制戰局，以為輕鬆響頭炮，點知半場中段少林寺已經冇晒優勢，仲俾有基頓同安達回歸助陣嘅大埔攻返轉頭。有迪馬達先開紀錄嘅南華，換邊後被對手被逼和1:1，聯賽出閘即唔見兩分。
開季連輸兩場嘅大埔，70分鐘由澳洲前鋒基比斯入波；被追平1:1嘅南華，之後仲有陳七傷出，間接令主隊大埔攞到今季第1分。專程到場督師嘅南華足主張廣勇賽後笑住讚大埔士氣同狀態都比南華好，但之後就黑住面同班職員檢討點解踢得咁差。
南華隊長陳偉豪話發揮唔理想同天氣熱有關，狀態亦唔及對手，加上陣容唔完整，日後有多啲比賽相信會有改善喎。至於大埔教練鮑家耀話下半場球隊有唔少機會，但攞到1分已經好開心，仲話球隊多番安達同基頓，球員信心大增，今次喺強隊身上搶到1分，球員信心肯定有提升咁話。
飛馬4:1大炒元朗
至於太陽飛馬同日作客元朗，有剛踢完亞運嘅港隊中場鞠盈智回歸，表現果然唔同晒，半場搓住踢已由沈國強同拉斯錫各入1球，下半場元朗反撲不成，仲畀拉斯錫完成梅開二度以及禾尼亞錦上添花，終以4:1大勝有蘇沙破蛋嘅元朗。
識睇，一定係睇足英台【英波Live】：
http://soccer.appledaily.com
http://bit.ly/engballlive