科技縮短全球距離。當我哋喺電視新聞睇到陸續有美國、英國同法國嘅人質俾伊斯蘭國恐怖分子斬首，遙遠發生嘅殘殺行為，都變得驚心動魄，憤怒之餘亦覺可怕！
去阿富汗希望受訓
而對英國紀錄片導演Robb Leech（圖）嚟講，就更加震撼，因為佢繼兄Richard，由原來嘅BBC保安員，變成極端伊斯蘭教主義者，後來仲親赴阿富汗，希望加入塔利班受訓，但白走一趟之後返英，最終喺2012年俾英國警方拘捕，被控告圖謀參與恐怖活動罪成，判監六年。
「他迷惘、孤單、感覺生命沒有意義」。呢個係弟弟Robb分析兄長成為恐怖分子其中原因。相信好多人都會有興趣知道，喺文明國家，一個人原本好哋哋，點解會變成恐怖分子？英國社會到底出現咗啲乜嘢問題？導演Robb先後拍攝兩部紀錄片，探討哥哥成為恐怖分子歷程及原因，《我哥是恐怖分子》（My Brother the Terrorist）係《我哥是伊斯蘭教徒》（My Brother the Islamist）續集，將於10月4日同5日喺BBC World News頻道播放。