我喺東莞出世，96年9歲嗰陣同媽媽、妺妹移民嚟香港。我出世時有黃疸病，但媽媽係第一胎冇經驗，冇多理會，隔咗冇耐，媽媽有位朋友發現我面色好黃，於是抱我返醫院，發現我嘅黃疸病已經好嚴重，遲啲入院就會有生命危險；當時醫院落藥太重，影響我嘅聽力，但一直到喺香港讀小學做體檢時，先發現我嘅雙耳只剩番一半聽力。
一半聽力無礙溝通
但我先講明，我唔係聾，只係喺好嘈嘅地方，你要叫我嘅話，要好大聲，或者叫多幾次。記得最驚係小學體檢後，醫生叫我學定唇語，我第一個反應係：「唔係啩，好難學喎！」後來謝天謝地，呢廿幾年來，聽力都冇差到；只係有啲英文嘅字好似S同H，我就發唔到音，但聽電話都冇問題。
攞到划艇歷史首金，我當然開心。講真，到𠵱家返到香港，我都有啲唔係好真實嘅感覺，呢塊牌由前兩屆亞運等到𠵱家，咁難得，我會鑲起佢，放喺屋企客廳；但呢幾日會帶住金牌同家人返東莞探親，包括婆婆同嫲嫲在內，我都想佢哋掂吓塊金牌。
識睇，一定係睇足英台【英波Live】：
http://soccer.appledaily.com
http://bit.ly/engballlive