最近運輸署中人聚首一堂都會數臭「檸茶男」！邊位「檸茶男」成為署方鬼見愁？原來係民建聯元朗區議員李月民（圖）。八方早前都寫過，元朗區喺689宣佈授勳前夕發生茶杯裏的風波，李月民因為巴士路線重組問題，喺一次活動「倒瀉茶」落運輸署職員身上，驚動特首狼英勒令佢道歉。
有知情人士向八方再爆料，當日倒瀉嘅係檸檬茶；而雖然李月民事後不情不願地寫信去運輸署道歉，但封信被認為毫無誠意，署方唔收貨，唔知點解民建聯出嚟講到好似署方欺壓佢哋咁？仲大數李月民根本喺區內肆無忌憚，自以為有民記招牌護身就橫行，難怪運輸署私下封佢做「檸茶男」，俾佢纏上就肯定有難。