【抗命時代】
【本報訊】官逼民反，每個人都有去飲的理由。有人赴宴是為了下一代未來，希望子女享有真正普選；有人是因為心愛這片土地，不希望她在689手中繼續沉淪。爭取社會公義不只是佔中三子或罷課學生的責任，每一個愛香港的人都應該要承擔和付出，繼續冷眼旁觀及冷嘲熱諷不會令香港變得更民主，只會助紂為虐，令香港變得更陌生，最後成為梁愛詩口中的直轄市。
記者：林偉聰 袁柏恩 梁御和
劉舒文
28歲
廣告從業員
想同大家講…
「最近facebook好多朋友、好多香港人都將學生相轉做profile picture，我覺得好開心，越來越多人關心社會，關心香港。香港好多議題都值得大家關心。我哋出嚟遊行、示威，好多時候都會問，其實咁樣做係咪真係有用？我坐完咁又點呀？我遊行完咁又點呀，我遊行完繼續返屋企瞓覺？後來我諗咗好多次，當你唔做時，就一定冇用，但如果你行出來，做多步行多步，就一定有用。既然大家咁關心香港，係咪可以做多步行多一步呢？希望大家諗吓自己付出嘅代價，係咪可以比𠵱家更多。」
丁良晨
26歲
演藝學院學生
想同所有仍未麻木的
香港人講…
「我哋而家嘅生存空間喺度慢慢收窄，你見到生活越嚟越少選擇，希望你哋行出嚟，一齊奪回我哋應有嘅權利！」
楊匡
47歲
社運人士
想同各位戰友講…
「各位加油。因為呢個運動十幾年喇，已經無路可退，如果大家仲繼續做以前嘅自己，其他乜都做唔到。望吓大陸，好多人拉咗再出嚟，出嚟再俾人拉，如果我哋唔怕嘅話，勝利真係好近！」
簡浩名
52歲
巴基斯坦裔商人
想同香港人講…
「我膚色同大家唔同，但我同大家一樣都係香港人。我愛香港，我想問香港人，你哋仲愛唔愛香港？你希唔希望我哋下一代喺一個冇民主冇自由嘅社會長大？如果你唔想，請你哋行出一步，一齊爭取真正嘅民主！」
范沛縈
24歲
組織幹事
想同香港市民講…
「我知唔同階層嘅街坊都會被工作、生活掣肘，因此選擇沉默，無法參與呢場運動，但係沒有民主、哪有民生？出嚟支持學生，亦係支持自己爭取民主，讓我地嘅投票不會被壟斷，讓我哋嘅聲音可以去到議會。」
韓連山
65歲
退休中學教師
想同梁振英及共產黨講…
「你拘捕我，仲有千千萬萬嘅香港人會站出來。You can't kill us all. 香港人爭取真普選已經太耐，我哋唔會輕易放棄，我哋會用唔同方法為下一代爭取一個有真正民主自由嘅香港。」
陸冠宇
鍵盤戰線成員
想同梁振英講…
「上次我哋對起錨方案袋住先，結果我哋袋咗你。𠵱家你同你主子，擺出同樣態度要我哋袋住先，似乎今次香港人應該食唔落，只要你一日仲係推行咁嘅政改方案，我哋所有公民抗爭會一波又一波咁嚟，睇住嚟。」
甘浩望
66歲
神父
想同全中國人民講…
「如果我喺佔中行動入面真係俾人拉，我想同全中國人講真正民主係全心、全意、全靈為人民服務！冇其他嘅民主！」
林森成
72歲
林慧思老師父親
想同青年人講…
「你哋有勇氣參加呢個飲宴活動，希望大家豁出去，預備公民抗命嘅責任，公民抗命係好崇高嘅理想，唔係個個抵受到壓力，就算佔中十死士都有人退出運動，我希望大家努力，成功爭取真正嘅普選。」
甄霈霖Lance Yan
平面設計師
想同689講…
「香港特別行政區嘅首席行騙長官689，又名梁振英，我係你嘅良心。你今日所做嘅事，唔止係面對你嘅阿爺，而係面對香港700萬市民。你再執迷不悟，就會成為歷史罪人，你要面對你嘅良心！689！」
吳美蘭
中學老師
想同在天堂的媽媽講…
「媽，你已經離開咗我五年，呢五年香港已經冇以前咁可愛，當初我相信會有普選，但等到𠵱家，2017係一個中共式普選。我知道父母一定唔想女兒行得咁前，但我深信你會明白我。作為公務員可能我會冇咗長糧，但為咗香港未來，香港嘅下一代，我係絕對唔會再沉默。」
李知樂
港大學生
想同保皇黨講…
「你哋究竟有冇廉恥，究竟知唔知自己做緊乜嘢？你哋點解可以出賣自己城市，自己嘅香港，出賣我哋，點解可以咁樣對香港人？唔知你哋真蠢定假蠢，希望你哋會覺醒。好多民主運動一開始都唔知會否成功，但最後都會成功。」
歐陽東
藝術家
想同爸爸媽媽講…
「我知你哋好擔心我，好想我簡單咁組織家庭生活，但喺呢個世代，要平平安安生活落去已經好難，我哋已經冇可能再負擔一個家庭，冇可能結婚生仔，因為呢個世代冇畀機會我哋。所以對唔住爸爸媽媽，我必定要做呢件事，不只為我，也為咗你哋。」
岑子杰
香港彩虹成員
想同男朋友講…
「對唔住，我總係要揀一啲路係要你擔心，但我認為我選擇嘅路，係為咗我哋嘅將來着想。我哋都係同志，我哋喺未來社會會面對好多歧視，我哋有好多訴求希望政府回應，如堅持𠵱家呢一種人大落實嘅方案，我哋嘅議題，永遠唔會喺社會得到討論。」
盧藝賢
嶺大文化研究三年級生
想同弟弟講…
「好多謝你，支持阿哥參與社會運動，亦知道屋企比較大壓力嘅時候，你會幫我向阿媽講：『呢啲嘢如果唔係阿哥做嘅話，呢個社會仲有邊一個做？』社會有好多不公義，我哋每一個都有不同崗位，多謝你幫我頂起屋企嘅壓力，我可以全身投入社運。」
朱凱迪
37歲
土地正義聯盟成員
想同身邊戰友講…
「今次只係我哋第一次佔中，我哋一定佔完再佔，誓不罷休，直到爭取到真普選。亦都要同屋企人講，可能唔係淨係一次俾人拉，可能要俾人拉好多次先可以達到目標！」
郭紹傑
政府救生員
想同家人講…
「我知我係公務員，如果我犯法嘅話有機會炒魷魚，但係我預咗炒魷魚！因為我為咗香港嘅未來同下一代！屋企人成日要為我擔心，但我哋係為香港以後可以有真嘅民主，希望大家體諒同支持我。」
王惠芬
44歲
融樂會前總幹事
想同做緊旁觀者嘅香港人講…
「好多國家享有民主人權自由，其實付出咗好大代價。香港憑乜嘢想唔付出代價就擁有民主？冷漠同旁觀只會令香港越來越差，民主唔會唾手可得。只有透過行動，先可爭取到真正民主。」
彭樂欣
23歲
註冊社工
想同香港市民講…
「我希望每個人嘅生活，或者係理想都被尊重，所以要有一個民主嘅社會，同埋真正嘅普選，咁先可以好平等咁講出自己嘅想法、過自己理想嘅生活。」
何汝瑛
26歲
組織幹事
想同父母講…
「希望爸爸媽媽明白我點解會咁做，明白點解會有一班人寧願犯法都唔驚，要走出嚟，其實係想香港有民主，有更加好嘅發展、一個更加公平嘅社會，希望爸爸媽媽都會體諒我。」
周子俊
29歲
錄像導演
想同女朋友講…
「我想講唔好意思，帶壞咗你。公民抗命呢樣嘢，我幾年前都做過，初時你都好擔心。但諗唔到今時今日，你會同我一齊出嚟。我慶幸女友嘅想法同我接近，有同樣目標，同樣願景，去飲都係為咗我哋未來去做。」
蔡錦源
53歲
香港電視前高級編導
想同佔中三子講…
「戴耀庭教授、陳健民教授同朱耀明牧師，可以嚟飲呢一餐，同你哋坐埋一齊係我嘅榮幸。其次，我想同我個仔講，我今日所做嘅嘢，你會為我驕傲。」
盧松昌
反美孚建屏風樓小業主
想同香港人講…
「真普選遙遙無期，形勢惡劣，但係阿爺只係隨歷史潮流而動，唔代表真理，佢哋只係紙老虎，有朝一日，佢哋都會好似黃河咁向東流，只會好似垃圾咁衝落地底，只要我哋萬眾一心，就可爭取到我哋應得嘅嘢。」
張貴財
新界東北村民
想同兒子講…
「我哋香港社會已經去到好唔掂嘅地步，我所做嘅嘢，希望你一直傳承落去，同埋傳承畀你個仔知道，我哋要一直延續我哋嘅民主自由，我哋應該要有言論自由，香港人唔能夠變成奴隸。」
