要嚟嘅始終都要嚟，債王格羅斯屢傳同其他管理層不和，上個禮拜五終於劈炮唔撈，同日宣佈過檔規模細好多嘅駿利資產（Jenus Capital），消息震動金融市場，傳媒當然繼續追蹤內裏原因。
《金融時報》八到，話PIMCO管理層原本打算上周末請債王食無情雞兼作過度安排，點知比格羅斯先發制人，禮拜五搶先遞信，仲爆響口話同公司死對頭DoubleLine傾過加盟事宜。PIMCO中人覺得債王咁做對公司造成最大傷害，覺得佢好冇吉士。不過，從好嗰方面諗，佢哋覺得債王反轉豬肚可以畀大家團結一致重新上路。
PIMCO冇咗債王能否重振雄風就有待時間分曉，但市場憧憬債王加盟會吸引客戶過檔，駿利資產上個禮拜五股價飆升43%，單日市值增加9億美元（約70億港元），成為最大贏家。