【壹週刊】佔中臨近，警方愈嚟愈緊張，有位喺交易廣場第三期返工嘅讀者報料，人大政改落閘之後，李飛嚟香港宣旨嗰幾日「高危日子」，見到有班着晒軍裝嘅警察走上去十八樓，跟住不時見到差人蹤影。十八樓成層面積超過一萬平方呎，現時無人租用，業主放租呎價百一、二蚊，即係每月租金過百萬。
本刊現場觀察，發現十八樓鎖咗電梯，記者要行樓梯上去，大門上咗鎖，從門罅望入去見到一堆啡色膠櫈。有交易廣場員工話啲櫈係警察搬上嚟用嘅，已經嚟過幾次，通常有遊行嘅日子就見到有軍裝差人上去休息，有人懷疑警方高層用呢度做反佔中指揮中心。
警方係真金白銀租用成層甲級商廈？定係問人借返嚟？地方用嚟俾警員休息？定係有其他更重要用途？對於呢個可能涉及百萬計公帑嘅問題，警察公共關係科只係答咗七個字：「警方不作出評論。」
各位立法會議員，似乎真係要調查跟進一下。
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/