禮拜六跑馬一向利冷唔利熱，呢日頭三場已經爆爆哋，到第四場三T頭關五班1600米，更加爆到七彩，吳廐未勝馬「開心得意」以三零部隊身份突如其來，夥拍賴維銘後上一攻而破，爆68倍大冷W，取得服役首捷，跑二、三名分別係9.2倍「福盃滿賞」及79倍「威水」，Ｑ派3,638.5元，三重彩12萬之多。
「開心得意」係P布拍賣馬，上季出道後一直近都未近過，暑期一下子減十分跌到16分，成為現役最低分馬，評磅員擺明睇死佢前景。不過吳定強卻發揮救馬專家本色，安排「開心得意」本月21日先跑一場千四，跟住匆出改配徒弟賴維銘出戰千六米，結果一擊即中，師徒攜手打破今季悶局，成為佢哋嘅得意之作！
吳定強說：「其實今場海軍鬥水兵，水準不高。此馬之前雖然未曾入過三甲，但上場只輸六個馬位並非太差，本身有點進步，因此今仗爆冷並非完全無跡可尋。」馬主繼續開心團體成員之一的吳耀國表示，「開心得意」走來均速，可能今仗增程跑1600米更合，是帶來驚喜的原因。