亞運打打吓斷棍，係我鄭仲恒26歲仔頭一次。被取消資格後落台第一句想講係：「唔好意思。」好想同一直支持我練武嘅家人朋友講，大家唔使擔心，唔係世界末日，反而覺得係時候進軍演藝圈。下月初我會去廣州參加《中國好男兒》，希望有一日做葉問！
挑戰《中國好男兒》
我由細到大都好有表演慾，但冇諗過第3次參加亞運，竟然比參加2011年《超級巨聲3》，10強因要去土耳其參加世錦賽（最後得對練金牌）而中途離場更戲劇性。其實，今次我用嘅棍係特登喺內地買嘅規定棍，好難斷，中國選手都係用呢款。我用咗幾個月都冇事，賽前又檢查過好多次，點知比賽初段打打吓就斷。
只可以講句人生如戲！我唔知下屆仲會唔會參加，但暫時會先放時間喺演藝事業；一直有個做明星嘅心願，剛好有朋友叫我去廣州參加《中國好男兒》海選，我會邊唱邊跳，仲會表演吓武術。下一步，我好想拍戲，會先朝武打方向，有一日做到葉問當然最好啦！
識睇，一定係睇足英台【英波Live】：
http://soccer.appledaily.com
http://bit.ly/engballlive