上周英超戲碼甚多，淨係曼聯對狐狸李斯特城，已經夠你唱/笑/悲足幾年。上半場輕鬆，下半場陰公；歷史上可以領先兩球再被連入4粒，反領先兩球者非常罕見，買走地盤者全部盡上賊船，好彩小弟估入球「大」，卒之開入球「極大」，冇累街坊。
至於另一場雙藍大戰，雖然入球兩粒，但好睇之處，在於一男子，林柏特（圖）也。踢足13年，車迷一早已經當佢係球會一塊肉，即使過檔曼城，依然唔會柴台。呢一點非常難得，死忠球迷一向視倒戈者為二五、反骨，不論中外皆是。君不見市面有幾位倒戈球員，輕則噓聲，重則望你PK兼攞牌，最好老烏Own Goal，然後再喺社交網集體欺凌你。
林生好明顯冇咩仇家，相反，為曼城臨尾追番粒，入波後冇表情，轉身就行，呢啲真係男人嘅浪漫，竟然連在場車仔迷都替佢開心。賽後訪問焦點，佢話做番一個球員責任箒，一句到尾，我係男人見到都覺吸引。一隻佬，無論職場情場，好多時候會遇到倒戈或反面，忘情負義兼得戚者你我見得多，更甚仲贈多句「係你唔要我箒」，但低調得宜者甚少。碌咗13年洪興，趕你去東星，再劈番自己兄弟真係惡啃。喺臥底電影入面一定會放呢啲心理矛盾位畀演員發揮，就好似《辣手神探》同《無間道》梁朝偉，唔信自己回帶睇睇。
梁栢堅
填詞人+彩池人
識睇，一定係睇足英台【英波Live】：
http://soccer.appledaily.com
http://bit.ly/engballlive