電視台神劇不再、膠劇橫行，過年送上上世紀煙花之時，YouTube等網絡媒介興起，彷彿已經變成香港另一個電視台。網上新製作力量興起，首先彈出的是一班網絡女神。連男神張智霖《你是如此難以忘記》MV都邀請演出，她叫：娘娘杜小喬。
撰文：藍文浩
多得社交網站，人人都拍片上網。年輕人拍片表達想法，吸金同時要吸睛，亦孕育出一班網絡女神。杜小喬年多前被「熊仔頭」邀請拍片《男人有話兒2》（ http://youtu.be/mHURZt-egUA），短短時間就成為今年高登女神總選第9位。她日前就與一班網絡紅人應英皇教育邀請出席開學活動，跳出網絡世界，杜小喬以一身招牌藍白間條上衣現身。
伯樂熊仔頭帶出山
以嬌柔聲線加甜美笑容拍攝野蠻女友式網片之後，「娘娘」就變成她的稱號，她說：「要多謝熊仔頭，其實當時係唔知故事，就糊里糊塗咁應承，角色亦都造就我由杜小喬變做娘娘。個角色巴渣、活潑又搞笑，但係未必完全係自己嘅性格嚟嘅。」
擅長以問句令話題繼續延伸的她說：「其實『娘娘』嘅性格同我自己好唔同，我以前靜啲，不過𠵱家開心咗，可能因為有咗拍攝經驗，令我性格都改變埋。」人紅事忙，她與經理人簽約，又盛傳與伯樂熊仔頭「分手」。娘娘首次公開回應：「我哋唔係割席呀，朋友搵得多或者搵得少，可能都係因為有唔同發展啫。我話嘅，如果佢叫到我的話，乜嘢片我都一定拍！」
收兵絕招駕輕就熟
時下潮語「收兵」正好套用於娘娘的感情世界，她旗下兵力相信是大家最感興趣的一環。問到她感情狀況時，她即笑着講出欲擒故縱式對白說：「唔知呢？」然後說：「其實我有好鍾意嘅人，不過……唔知呢？」為大家帶來無窮幻想的答案，高手也。最重要的入職條件，亦是很多巴打的疑問，她說：「最緊要係錫我、錫我同錫我啦，最好似熊仔頭咁幽默，有少少咁多大男人，就算明知我唔啱都畀少少位我入得㗎喇。仲要對家人好，咁樣會令我諗到將來。」
形容自己為talent的她，提到以後發展時說：「我唔算model，又好似唔算artist，我鍾意acting，因為行內接觸到好多唔同嘅人同故事。現實做唔到嘅，拍嘢時都可以合理地做，所以我希望可以繼續做落去。如果有機會我梗係想試吓唱歌，不過知道自己能力未必咁好，技巧係零。」
場地提供：英皇教育
