運動世界有時真係夢幻過迪迪尼，前兩日嘅報道，天使迪馬利亞話多謝雲高爾提拔，覺得自己家陣狀態大勇，仲希望每日都可以繼續進步！每日都進步？即是聽日好過今日，喺今日社會面前，呢句說話實在太久違嘞，家陣生活邊有呢個空間比大家講啲咁不切實際嘅嘢呢又！
香港體操零的突破嘅石偉雄，佢話亞運攞金牌就好似佢嘅座駕福士咁，幾好但唔夠好，希望第日提升到可以去揸林寶堅尼嘅水平，即係喺奧運都攞到牌！嘩，若果唔係有天使同王子提醒，我哋可能都唔記得咗原來可以有夢想呢味嘢！
得閒踩吓車都話要搽太陽油兼好怕流汗嘅你，又點會覺得自己可以同李慧詩share同一個夢想吖，進步？太奢侈嘞。
唉，成長嘅80年代好似乜都好啲，歌好聽，戲好睇，天好清，記得當年喺戲院睇《回到未來》嗰陣，咬住爆谷心諗未來係點㗎呢，會唔會真係有着咗曉飛嘅波鞋？立體電影係咪會興奮度增加10倍？今時今日，有立體嘅電視，曉飛嘅波鞋亦可能遲早有，但興奮度有少無多不特止，仲唔見晒啲夢想。
鍾意跑步嘅朋友最記得自己嘅pb，鍾意踢波嘅呢就對自己嘅金球念念不忘，但其實我哋絕大部份長時間都只係喺低潮處掙扎。以往幾威只係用嚟嚇細路，未來每一段路每一腳步都無影響。要再創高𥧌、明天跑更快，好多都係癡人說夢，反而平實要求自己唔好退步得咁快已經好感恩。
諺語有云 no news is good news，計我話做香港人又好，做運動人又好，唔退步已經係進步！我求其問咗幾位朋友，佢哋嘅唔退步wishlist分別有：人工唔好退步，電視唔好退步，打機唔好退步，髮線唔好退後，感情唔好褪色，曼聯唔好退步，美斯唔好退步，鬥志唔好退步，同埋香港唔好退步。
或者大家嘅心底願望， 係未來有日真係有部時光機，進步到可以返去舊時嗰度，咁就可以日日唱明天會更好！
KEYMAN
節目主持
mailto:[email protected]
識睇，一定係睇足英台【英波Live】：
http://soccer.appledaily.com
http://bit.ly/engballlive