「龍華」系馬主、香港聯和國際集團董事局主席謝國輝，剛周四在深圳福田舉行宴會，與生意夥伴分享營商心得，期間安排咗女子樂隊等各項表演娛賓。謝國輝係深圳龍華鎮首富，佢話自己國內生意越做越大，旗下有36家企業，涉及房地差、金融、投資擔保、礦業及農業等，自爆資產達120億，仲計劃公司未來喺香港上市！
至於謝國輝太太金沛橋，就醉心搞娛樂事業，佢做製片人，搵咗朱咪咪同KK張國強開戲，拍攝喜劇電影《黃金福將》，男女主角分別係韓國型男李承炫同埋拍過成龍《十二生肖》嘅內地1米77長腿索女張藍心；金沛橋個女謝金鈺殷都做埋一份，飾演李承炫個妹。
謝太透露《黃金福將》已拍完，正做緊後期工作，大約情人節時上映。佢好謙虛話自己喺拍電影方面，仍係吸收經驗階段，禮拜六(27日)約了著名導葉念琛入馬場，一齊為自己嘅愛駒「國粹精華」打氣外，仲會傾吓電影嘅事。
至於轉投呂廐初出嘅「國粹精華」，謝太指練馬師呂健威落咗很多心機訓練隻馬，本月12號試閘後上有力輕勝，一切已經準備就緒，相信呢匹四度入Ｑ而未贏過嘅馬，有望作出突破喎！