反佔中陣營為咗反佔中真係乜都做得出，早排《文匯報》將「民主真兄弟」老作假嘢當新聞，話學民思潮黃之鋒獲美國海軍陸戰隊員傳授格鬥術，俾人恥笑為乜唔索性老作話之鋒係神盾局（S.H.I.E.L.D）特工，八方噚日又喺中環美利道天橋，見到一首抹黑佔中嘅打油詩，不過貼詩嘅人好慳水慳力，只係貼咗一幅咁大把，現場所見冇乜路人感興趣。
其實呢類抹黑唔會有人信，好似「民主真兄弟」前日抹黑佔中發起人陳健民，陳健民噚日係facebook貼咗張相，有人喺佢辦公室門口貼咗張「Keep Calm and Occupy Central」（保持冷靜，佔領中環，圖）為佢打氣，陳健民留言話：「感謝！我平靜安穩，各位放心」，此外仲提醒罷課學生，今朝9點半同埋11點半，佢會為參加罷課嘅同學們補課，分別講社會學同埋社會運動，中大校友亦可以到講社會運動嗰堂旁聽。