今個星期比賽的重點，是英超周六上演的兩場打吡。頭場默西賽德郡打吡，更加係Stephen及立民兩隊愛隊互撼的日子，所以今日唔講數據，而將我哋嘅真實對話呈現！
Stephen：1894年第一場打吡，係由我哋愛華頓（圖）贏㗎！聽講頭5次你哋都贏唔到，要去到1897年先第1次贏我哋！
立民：已經係咸豐年前嘅事啦！𠵱家踢咗222次，我哋贏咗89次。你哋？好似得66次，連埋67次和波，即係你哋有70%比賽贏唔到囉！
Stephen：70%？又唔見你講吓今年入波係我哋70%未夠？淨係鬥入波，你哋都無得鬥啦。仲要你哋有1球烏龍波、1球12碼。
立民：其實要贏波入波唔一定要多，1:0都可以啦！不過好似有隊波，近3季作客晏菲路都入唔到波，仲要近8次碰頭，1次都贏唔到。
每次利物浦對愛華頓都令人萬分期待，因為入球、紅牌往往不會少！史杜列治今場有望復出，對紅軍攻力應有幫助。愛華頓作為英超的失球王（13球），相信今場難保清白，智勝雙雄傾向推介有2.25倍的半場入球「大」，因為雙方近兩季4次對賽，有3次上半場已出現最少3個入球。另一場揀來星期一晚的史篤城對紐卡素。紐卡素經歷季初低潮後，近期已有起色，近4場賽事都開「大」。史篤城今季主場未開齋之餘仍未有入球。球隊的攻力其實不是太差，相信是時候打破主場入球荒。
STEPHEN、立民
有線球彩台智勝館主持