24歲嘅馬壇神童蔡明紹幾年內人生大轉變，由一個學生哥，到出道做騎師，火速成名，並結埋婚生埋個女Jessica May，都係大約五、六年內嘅事。
愛情家庭就得意嘞，但今季紹仔嘅事業起步就麻麻，跑咗四次賽事，紹仔暫時仲未開齋，最叻只係一班賽廣東讓賽盃騎隻「美麗之星」得亞軍，臨尾被李嘉欣隻愛駒「貳寶」追過衰收尾。而師傅告東尼季內兩場頭馬「尊兄」同「一定旺」，都冇紹仔份。
不期今期沙田日馬，紹仔開齋機會嚟喇，第九場隻新星「牛精叻仔」，原本紹仔已失去帥權，上季由雷神三捷，今次失而復得，當然要落足心機發揮。隻馬今個月12 號由紹仔試大閘，一放到底，頂住唔少一班馬嘅衝刺勝出，走勢好強勁，踏入新一季明顯成熟進步唔少。今次增程初跑1600米亦唔使擔心，因為同父馬「百事多利」贏過德國打吡，血統絕對有長力，加上「牛精叻仔」排個一檔有利，睇嚟紹仔除咗有個囡囡外，呢個叻仔亦可以令佢笑騎騎，大可以湊成一個好字。