民主黨決定佔中後，搞過幾次佔中訓練，𠵱家「去飲」在即，據聞民主黨上下都做好「去飲」會被拉嘅準備，噚日佢哋搞咗個派佔中物資活動，幫班「去飲」黨友準備晒佔中必需品。
有民主黨人自嘲民建聯派福袋，佢哋又派福袋，但人哋係蛇齋餅糭，佢哋係眼罩、毛巾、T恤，最叻有支水畀你飲同洗眼，講真就冇得同人比，但為民主抗爭，又比食蛇齋餅糭更有意義。
另一民主黨中人同八方呻，今次佢哋出嘅佔中人數，應該係泛民政黨入面數一數二，可惜冇乜人覺得佢哋做得啱，溫和街坊話佢哋做乜咁激進、激進泛民支持者又話佢哋抽水！雖然係咁，但佢話民主黨今次係憑良心做事，唔理得人點睇！