高鈞賢自從10年前從加拿大回港，毅然去選香港先生，雖然當年以大熱姿態奪得冠軍，不過星途並未平步青雲，最後黯然離場，礙於香港畫上句號，北上發展重新開始；誰不知這鋪置諸死地而後生，竟然令他的計劃有所改變，他說：「雖然冇咗個大平台，但係集齊好多個細，力量都唔會弱，我想做啲成績畀以前睇唔起我嘅人，話畀佢哋聽係錯！」
撰文：何慧斯
今年30歲的高鈞賢，離開無綫後，突然間變得關注度極高，日前更應邀接受訪問，在大熱天時下跑步，接着又走到泳池游水，未知是否呼吸不少自由的空氣，訪問當日感覺高鈞賢有煥然一新的感覺，少了做藝員的拘束，為此，高鈞賢笑說：「其實我本身配合度好高，只不過可能以前年紀細唔成熟，贏咗成日預期有好多嘢；離開無綫之後，冇諗過會有job，最初諗香港已經畫咗句號，重新喺內地慢慢去學，點知有好多平台媒體關注，將來可以去唔同嘅平台都係好事，你當係頭盤又好，甜品又好，希望可以做到啲成績。」
重奪自主控制權
現階段高鈞賢將會在中、港兩地物色經理人，助他發展事業，香港方面將會加盟Amanda S.的經理人公司，內地方面則在洽談中，談到內地工作安排，他說：「我想做啲成績畀以前睇唔起我嘅人，話畀佢哋聽係錯，當然亦都想有啲planning，以前嗰9年都冇乜plan，唔會知道聽日會做啲乜嘢，所以𠵱家想攞番個控制權，做番啲適合嘅嘢，其實都好冒險，但係唔試過唔心息。」
近年有不少大台小生、花旦相繼北上發展，高鈞賢不諱言自己的情況與他們不同，他說：「佢哋喺香港做到某啲成績過去，但係我只係抱住個勇字去做，唯一好處係由零開始，呢方面有啲優勢。」他更有感而發地說：「4年前我打籃球整傷腳入醫院，嗰排係最唔開心，仲要凍薪，又有經濟壓力，成日諗點樣可以突出自己，咪惟有靠打籃球發洩，希望可以搵番個自尊心，結果打到斷腳。屋企人嚟探我，同我講鍾意咪堅持，屋企唔係好有錢，但係我堅持多幾年，屋企人都可以幫到！」他續說：「呢行係講天時地利人和，當初唔信，𠵱家唯一可以做係做好件事，我自己性格被動，好多時仲為自尊心而得失咗好多機會，某程度為飯碗會改變少少，當然，呢個始終係我，可能喺TVB冇人欣賞我呢個性格，但係可能出面有呢？只要有一個人欣賞我呢個性格，我諗我唔需要變得太多。」
為將來努力堅持
高鈞賢亦透露自己有計劃出書，以80後的心態去分享：「香港雖然好好，但係畀年輕人嘅機會唔多，好辛苦讀完大學，只係嗰萬幾蚊，點解會係咁呢？希望我可以做少少鼓勵佢哋，雖然係難啲，但係有時要諗一個變化去努力堅持。」至於信心方面，他則說：「有一段時間睇到做嚟做去都係呢啲嘢，有諗係咪要搵定後路，但係原來唔啱我，長處都係喺呢一行，𠵱家信心多咗，好似冇浪費過往9年，啲人都仲記得我，不過我冇怨過，只係覺得咁多年唔開心，點解佢哋喺最後一年先挽留我？但係只係憑口講去畀機會，同我自己去搵機會有乜分別。」
