《明報》前老總劉進圖（圖）被斬六刀，養傷超過半年，久休復出，今日喺新媒體研討會分享經驗。據講佢一收到主辦單位邀請，立即答應。
國際特赦組織香港分會同國際記者聯會等團體合辦「新媒體的挑戰」研討會，請咗全球各地新媒體代表嚟香港，包括總部喺紐約嘅Propublica主席Dick Tofel、大馬聯合發起人顏重慶、前主場新聞總編輯余家輝討論港澳新媒體嘅困境。劉進圖以世華網絡營運總裁身份，喺下晝公開討論環節做講者，同內地學者陳杰人等專家分享新媒體面對嘅法律風險、市場策略挑戰。研討會今朝11點至夜晚6點半喺城大LT3舉行。