時間過得好快，歐洲各地比賽開始咗成個月，但感覺上同以往都真係有少少唔同，部份球隊到家陣仲要諗緊方法增加人腳，但加人腳首要講錢。唔少大球會人腳其實都好多，呢個時候仲假於外求，其實係咪應該為隊裏面啲打波人仔諗吓，放吓佢地落場，又或者借佢哋出去，等佢哋有多啲上陣機會，到最後可能雙贏喎。
上星期日喺旺角場見到秋田做緊佢啲拿手統計，於是就問佢有咩好嘢，佢話呢排好留意英超，仲話有幾隊啲「大細」幾好玩，佢仲話知道我唔鍾意玩「細」，所以專登度條精選「大」過關俾我玩吓，先嚟場利物浦對愛華頓，再嚟夜場阿仙奴對熱刺，「大」有1.54x1.65倍，就咁乘埋有兩倍幾，熱食都唔錯。
佢仲話阿仙奴有咗曼聯嘅韋碧克（圖）後，前面有更多活力，演出好似仲好咗；而熱刺查迪尼雖然打右翼，但4場可以入兩球，亦不容忽視，希望順順利利再中埋2x1，咁可以請佢飲茶。
港超開季踢咗幾場，氣氛冇足總預期咁好，球迷好似冇乜點多到喎。咁多少同少林寺、大東方仲未上場有關，但志氣隊如果下星期二亞協盃4強次回合，過到伊拉克嗰隊硬嘢呢關就可以歷史性入決賽，決賽會喺香港大球場踢。
點知喺大球場又有煩野，聽聞大球場部份位置嘅廣告位早已以全季形式賣出；而亞協方面就講明比賽場地所有廣告收入由佢哋包收，喺咁條例下，志氣隊可能要幫大球場已經賣咗嘅廣告再畀多次錢亞協，聽講1個位要10幾萬，你都咪話唔肉痛。睇吓志氣隊聰明高層點拆呢單野，不過做球迷就唔理得咁多，最緊要就睇好波箒！
本地職業領隊
耳聽八方 專收好料