政總飯堂噚日下晝4點正式結束營業,雖然餐廳三年合約蝕足三年,但班員工噚日食「散水飯」時,都話好唔捨得。
蝕足三年 「畀心機做都冇用」
有員工投訴,對政府今次「食完即飛」感到好唔開心,話餐廳過去一直盡心盡力提供服務,食物從無將貨就價,但係就不獲續約,批評政府做法好唔公平,「政府擺明呃我哋,畀個陷阱跣我哋」。
餐廳負責人李先生同八方講,雖然餐廳三年嚟一直未回本,但獲唔少官員欣賞,不滿政府招標只睇「價高者得」,唔理餐廳過去服務質素,實際想逼人將貨就價,慨嘆「原來放幾多心機做都係冇用」,「我之前對住行政署長都咁講,咁嘅制度,係咪預咗人哋畀垃圾你哋食,三年約內賺到盡就走人?」據聞行政署長耍晒太極,話負責管理餐廳同決定批出標書,係兩個唔同部門負責,所以餐廳冇得續約都冇計!
李先生又指,其實餐廳唔比立法會餐廳差,唔少官員捧場,特別多人讚嘅係奶茶。有員工就透露,狼振英、鬍鬚曾、吳得掂、黎棟國、蘇錦樑等,平日都經常幫襯。八方就曾經同鬍鬚曾喺度食飯,佢都話啲嘢真係唔錯,特別係啲叉燒,原來噚日晨早無視學生約見訴求的狼英,就趁餐廳執笠前,叫司機朝早幫佢買外賣食,吳得掂更一日內幫襯兩次,難怪李先生亦苦笑話:「呢幾日係有史以嚟最好生意。」
李八方
mailto:[email protected]