今年10.1大家知要「去飲」爭真普選，其實呢一日仲係大半生奉獻畀香港、下個月就退休返愛爾蘭老家嘅余理謙（James Hurley）神父88歲生日，佢五十年代已經嚟香港服務，係六七暴動、反殖運動、保釣等大大小小社會運中，都見到佢嘅身影，仲培養一代又一代社運人，噚晚呢班後輩聚首，為佢提早賀壽兼餞行。
同余神父共事過嘅社運人，八方真係有排數，包括已故嘅社運元老吳仲賢，仲有莫昭如、沈昭如、工黨主席李卓人、前立法會議員劉千石、社民連梁國雄等等，大部份人都有到賀，阿人阿石就早走、長毛就唔見人，連曾係天主教大專聯會官方刊物《曙暉》做總編嘅長實執董趙國雄，都有留言歡送余神父。社民連劉山青噚晚有到，佢話八十年代喺大陸入獄，亦獲余神父去信鼓勵。
曾與李柱銘爸爸共事
講到同余神父共事嘅人，八方不能不提民主黨創黨主席李柱銘嘅爸爸李彥和。原來余神父係九龍華仁任教英文，正係李彥和係九華教中文嘅時候，當時余神父已經好關心社區，話說當時九華外嘅窩打老道冇裝行人過路燈，余神父自己向港英政府成功爭取加設交通燈。
余神父噚晚話，或者自己係愛爾蘭人，特別反對英國殖民統治，佢又記得係六七暴動期間，香港遍地「菠蘿」、冇人敢出街，連電車售票員都唔敢返工，余神父就幫手趁暑假搵學生幫手兼職賣票，令電車可以繼續服務市民，都可謂難忘。