郭富城、邵美琪、譚耀文及金燕玲等一班電影《踏血尋梅》演員，噚日出席喺尖沙嘴舉行嘅煞科宴，一早成班演員就齊集影大合照。城城接受訪問時話，已經做咗好多次警察，估唔到今次喺《踏》片又要做差人，佢話：「今次仲要做個年紀成50歲嘅老差骨，每次開工都要將啲頭髮掃白似番啲阿伯，拍嘅時候仲要減少運動，等身形唔好太fit，似番啲老人家有啲老態。」
「緣份未到囉」
問到城城有冇因為咁而肥咗嘅時候，城城話通常開工都食少咗，所以冇影響。講到感情事時，城城繼續耍太極話目前有3部戲同演唱會喺手，所以老土啲講感情事都係交畀緣份，但佢見異性都會避忌：「緣份未到囉，去到團體活動都會驚咗，明明唔係，加鹽加醋就唔好，冇必要俾人有動機去做任何嘢啦。」講到同房祖名合作嘅電影《道士下山》時，佢話淨係知道套戲已經拍完同做好自己本份，其他嘢就唔清楚。
另外，邵美琪同男朋友施祖男感情穩定，當場就有記者追問佢婚期，邵美琪話：「唔好咁多人面前問啦。」不過就俾同場嘅譚耀文話平時拍戲都有戴戒指，邵美琪解釋：「戲入面講我結咗婚，隻戒指係道具。」
撰文：馮仁昭