呢幾個禮拜不停煲荷李活特技片同港產驚慓片，不停的觀能剌激，搞到龍叔叔個人都幾繃緊，本來呢個禮拜仲有隻更重口味嘅《哥斯拉》，可惜截稿前仲未派街，索性買兩隻演唱會BD返屋企，當洗滌下心靈，亦好讓隔籬鄰舍安靜番一個禮拜。一隻容祖兒《1314演唱會》，一隻就巫啟賢《重回演唱會》，男人老狗嘅龍叔叔，理應急於重溫《太傻》同《心酸的情歌》嘅佬歌，不過上年喺現場睇過Joey，確實俾佢嘅歌舞感動到，好多位都值得推薦畀大家。龍叔叔從未試過睇演唱會要提前一粒鐘，目的就係早啲散場，遷就Joey趕下場某個音樂頒獎禮，雖然唔使旨意有咩encore環節，不過演出實在精采。《搜神記》極夢幻的燈光效果、《黃色大門》的巨型噴雪水晶球、《朱古力萬歲》的少女旖旎等，兩粒幾鐘嘅concert，讓龍叔叔有種重回十八廿二時嘅活力感覺。
演唱會DVD早咗成個月推出，龍叔叔忍住唔買等BD先入手。主菜28首歌，結尾首《加大力度》完場得幾突兀，幸好bonus多達13首歌，其他場數嘅encore部份都有收錄。可惜製作上有好多位都唔夠好，尤其暗位表現，雜訊多到以為睇緊DVD，拍攝分鏡及剪接手法，行貨得近乎有點老套，幸好舞台夠光猛時，畫質即時靚番晒，直逼4K拍攝水準，快歌的勁舞位，殘影及因壓縮而出現嘅noise唔算多。聲軌又係要讚嘅地方，BD分別提供既DTS-HD MA同無壓縮嘅PCM音源，都係以24bit/96kHz格式錄製，學陳奕迅話齋：唱直播跟CD一樣！值得一提卡拉OK部份，人聲剔除得幾好，唱起嚟唔會變成Joey細細聲幫你和音咁，而且重現好多演唱會BD都無嘅走馬燈式字幕設計，唱唔熟嘅歌都無問題。
有碟迷睇完，批評Joey把聲有啲沙。需知道當時Joey正患上氣管炎，仲要連續幾日頂硬上狂唱狂跳，只係好少位有聲沙情況，絕對情有可原。Joey嘅拼搏，讓龍叔叔越睇越汗顏，從軟熟嘅梳化爬起身，重回電腦桌前，打開電腦繼續趕稿。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
