我唔明，點解每次iPhone出新機，報章都賣頭條新聞！
你幾乎以為世界上有一個國家叫「蘋果」，每隔幾年便會選出新一任總統叫「iPhone」。
iPhone也就是一項商品，為甚麼三星、SONY、HTC出新手機，你報章不做大佢？
還有，這幾年，看電視直播施政報告的人少，除非你犯賤想激死自己；但上網收看蘋果手機發布會的朋友，愈來愈多，更視為品味潮流之舉。
原因簡單，公眾利益。
對啊，蘋果出新機，是符合國際標準的公眾利益，三星你別打我，因為蘋果手機，已經成為IPO！新機等於新股上市，散戶瘋狂入貨炒賣只想短炒賺一筆。
好景的時候，炒賣iPhone的收益比起MPF更高﹗可否請MPF的基金選項，提供「保守進取型：投資iPhone」，絕對跑贏大市！與其等政府派6000蚊，不如自炒16G細金！
但這次的iPhone 6慘變陽澄湖大閘蟹，大家莫名其妙，點解會蝕？
先要明白，點解iPhone有得炒？因為「不平等」。香港比大陸早一步發售iPhone，如果內地人想早買早享受，只能用高價收購水貨，這便造成香港的「果農」可以有一千幾百的水位賺。
但今天，國家部門宣稱，iPhone 6已進入最後審批階段，全世界觀望，10月1日國慶黃金周，會否就是生死線。如果當日大陸仍未宣布發售日期，則香港果農有望起死回生；如果大陸當日落實iPhone 6「登陸」時間，則香港果農可以準備將iPhone 6賣落果欄了。
有理由相信習近平北京接見富豪團，其實就是傳達這個重要訊息：誠哥四哥，你地有無重貨喺手？我告訴你，如果香港人敢喺十一擺酒搞串我個party，你有幾多人上街，我地就放幾多部iPhone 6上街，你們自己看着辦吧﹗