要數阿仙奴（圖）近兩季最最最值得研究嘅球員，應該都係奧斯爾。有人話「大眼仔」唔適應英超搞到好易俾人踢傷、又有人話雲格無擺佢喺最佳位置，更加有人話佢高峯期已過。其實，原因可以有好多，但係到尾都係得出一個結論，就係佢嘅表現，真係好唔穩定！作為阿仙奴球迷，我當然對奧斯爾有好大期望，話晒佢係世界盃冠軍隊成員，喺皇馬同德國隊都交出好多靚助攻，睇數據好應該成為兵工廠重心。可惜，除咗上季啱啱加盟時有幾場踢得好，一過咗蜜月期之後，佢就好似「食錯藥」咁， 水準一直差落去，就連眼都變細埋咁。呢位中場，已經由球迷眼中嘅寵兒，變成最唔想填落正選名單嘅球員……
上場對阿士東維拉，奧斯爾終於發威，一個入波加上一個助攻，表現好似有啲轉機，應該可以開始令批評佢嘅人收聲！雖然唔知奧斯爾今星期會「上身」定係無表現，會唔會再出現好多批評佢嘅聲音，但「大眼仔」係作為職業球員，就應該用雙腳去代替說話，為自己爭口氣！
新「兵」坐鎮Sure Win
其實，要爭氣嘅又點止得奧斯爾一個呀？普多斯基、辛迪卡索拉、雲格甚至成隊阿仙奴都要爭口氣！周中英聯盃主場被修咸頓踢出局，雖然唔係全力出擊，但係都好難令人接受。所以今星期阿仙奴都係時候做番啲野，始終球場上嘅回應，先係對批評聲音最好嘅反擊！
而且今個星期阿仙奴嘅對手係北倫敦嘅死敵熱刺，打吡當前，相信阿仙奴球員會踢出「大佬」應有嘅士氣。我就當然睇好阿仙奴啦，上年兩循環都贏1:0，今年有埋阿歷斯山齊士同韋碧克，攻力點都比熱刺高啩？一於撐兵工廠再贏多次1:0啦！
LULU
不懂踢波愛睇波