10月猛鬼出籠，更毫不避忌殺入鬧市搞搞震，好似隻眼大過個頭嘅單眼小僧同埋妖冶九尾狐，雙雙逃離海洋公園，跑到九龍灣MegaBox，密建「東瀛魔界遊」日本庭園結界裝置，在場見人就捉入結界，穿越時空回到江戶時代老巢。多啦A夢都嚟分杯羹，首次穿上魔法服，喺商場大玩哈囉喂派對，蓋搭法寶屋，與大雄及靜香等好友，挾人到魔法屋。
以吸血鬼裝扮嘅MegaBox總監文靜芝話，今次同海洋公園合作，即日起至11月2日喺商場建造哈囉喂鬼怪大影城，預計人流有兩成增長，場內消費4,800蚊，仲可以換領海洋公園門票一張，玩盡哈囉喂全日祭。