現年25歲的文詠珊（Janice Man），14歲開始當model，5年前被黎明看中收歸旗下，一夜之間由「𡃁模」變「模Art」，萬千寵愛在一身。今年7月，JM再收3,000萬轉會費加盟太陽娛樂，又自組公司成立JM Workshop榮升老闆娘，一切似來得容易，誰會想到JM竟然也曾經受97金融風暴影響，人仔細細便經歷家變，有苦自己知！
撰文：鄉奈仁
剛轉會的Janice Man工作排得密麻麻，幸好身邊有人車輪轉幫她處理大小事務，用不着她去煩惱，跟11年前初自己一腳踢，即使三更半夜收工，還要捱眼瞓坐通宵van回家，翌日還要提起精神上學，跟現在相比絕對大不同。
家變童年難過
訴說當年，JM日前接受本報專訪時嘆謂：「其實中學時代對我嚟講係冇乜開心回憶，嗰時最辛苦唔係身體上，而係心靈上，喺學校冇乜人會同你講嘢，好似覺得你好怪咁，又會有女同學攞住本雜誌出嚟掟喺枱，然後好大聲講『唓！懶靚咁！』係好唔開心㗎！咁可以點呢？返屋企一定唔會同媽咪講。」
JM有一個弟弟，作為長女的她，懂事以來便知道自己有責任撐起頭家，但說到97年家變，她當年只有9歲，JM說：「嗰時點會知乜嘢係金融風暴？只係知道屋企發生咗事，爹哋生意出咗問題，唔單止冇得坐飛機去旅行，仲要由九龍塘嘅國際學校轉去其他學校讀書，由私人屋苑搬去公屋住，你話呢啲變化對一個9歲嘅細路女係咪一個好大打擊？」JM還記得搬屋當日她不肯離開，媽咪看着她，哭得比她厲害。
夜晚匿被窩喊
不過JM自認早熟，很短時間便明白家裏起了甚麼變化，很想幫屋企出分力，直到14歲被星探發掘，便開始其模特兒生涯。她說：「知道嗰時有好多人會喺背後講自己，話你發明星夢，再難聽嘅說話都有，但唔開心都唔會畀父母知道，返屋企一定會笑騎騎，夜晚就偷偷匿埋被窩喊。」JM回想當日一邊返學，一邊工作只為減輕家庭重擔，即使要她再選擇亦會選一樣的路，因為家人對她是最重要。
場地提供：Rondavy's Artisan Kitchen
化妝：Vinci Tsang@VCmakeup
髮型：Matt Chiu@Xenter
甜酸苦辣：時間證明青出於藍
入行11年，經歷辛酸少不免，JM說：「好多以前覺得好苦好委屈嘅事，𠵱家諗番起都唔覺得係乜嘢一回事。」她憶述初出道時拍戲的事：「有場戲講我俾人打到飛起，但現場環境好窄，冇安全措施，但現場好似冇人覺得有問題，只係叫我快啲，當時覺得自己好苦，好想喊，但𠵱家諗番起覺得自己賺咗，因為當時好多演員撐我，友誼keep到𠵱家。」作為80後，JM又勉勵年輕人做事要有毅力，不要隨便放棄，她說：「我都係80後，都唔鍾意成日俾人標籤一代不如一代，所以要更加努力做好啲畀人睇。」
