年近68歲的純官鄭家純，為咗盤生意兼香港大事，仍然風塵僕僕，4天內乘搭三次飛機，飛完北京再返香港再飛武漢，認真唔簡單。年輕一代低頭一族打機宅男，都未必有佢咁好精力。
話說周大福（1929）重鎚投資嘅武漢珠寶園，噚日第一期第一階段廠房正式投產。呢檔嘢淨係講佢現時已經開工、興建緊嘅土地面積，都有成22萬平方米咁大，即相當於55個足球場，都咪話唔誇張。為隆重其事，主席鄭家純專程飛過來主持開幕，周一純官人仲喺北京參加富豪訪京團，周二即飛落去香港主持新世界（017）業績會，不足24小時又飛去武漢，相當頻撲。左眼因為神經線問題有啲「戚戚哋」嘅純官，噚日眼皮仍有點下垂，不過幾好精神，心情唔錯，仲主動搵香港記者打招呼㖭！