黃子華有段棟篤笑講過，潛能就好似尋寶，要努力搵先可以將潛能發展成才能；潛能呢樣嘢，你去搵唔一定有，但唔搵就一定冇。的確，如果你一直俾人讚有潛能，其實代表你無辦法將自己嘅潛能變成才能，即係話緊你無能。
𠵱家最紅嘅新星當然係史達寧（圖），呢位利物浦中場上季被球迷同傳媒開始發現佢有潛能，但嚟到今季，更多人係讚史達寧嘅進攻才能，獨自擔起紅軍攻擊線。史達寧今季進步非常大，射門同盤扭更超出預期。勢估唔到利記冇咗蘇亞雷斯後，前場最重要嘅就係史達寧。如果學子華話齋，發展潛能同尋寶一樣的話，史達寧應已搵到屬於自己嘅寶庫。
小弟又想講吓韋舒亞，佢一直俾傳媒狂讚潛力優厚，但讚咗幾年，今日最大嘅優點都仲係潛能。雖然韋舒亞間中會踢一兩場好波，但球迷只記得佢防守靠犯規、易躁、鍾意同球證拗頸。用尋寶去比喻，韋舒亞似係盲摸摸地圖都冇張，一時鶴臣叫佢學派路，一時雲格又擺佢打進攻中場，點到佢頭都暈。希望韋舒亞唔會好似曼聯嘅路爾斯安達臣咁，用咗7年都唔能夠將潛能變成才能，結果咪無能囉。
文：咖喱