阿里巴巴上市後，美股近日走勢較反覆，道指本周已連續三日收市過百點上落，加上細價股唔得，盲淡又翻唱老牛嗰頭近。不過，你有你唱，我有我上，道指仍企穩17000，淡友得果「恨」字。那邊廂，美元強勢方與未艾，如無意外連升11周，締造47年最長升浪。
事實上，美股今年屢創新高，狂牛已經五歲幾，大家不斷尋找「牠香」的故事，譬如陰謀論就斷言，阿里巴巴上市將是老牛嘅最後探戈，而市場近排亦開始炒作，美元強勢有損出口和經濟表現，對股市不利，為淡友造勢。
有圖有真相！對於那些指大戶力托大市，為阿里上市作嫁衣裳嘅揣測，當然無從驗證。反而最近有大行就針對強美元對股市不利的憂慮作出跟進，發現原來美元越強，美股就越精神爽利。
該報告翻查過去十次美元升跌周期，牛熊各佔一半，發現係美元係牛市期間平均升值43.7%，美股同期平均累升58.9%；而喺五次美元熊市當中，美元平均貶值29.4%，美股同期平均僅升31.4%，反映美元越強，股市越生猛，內裡原因在此不贅。
美元越強 股市越好搵
美元本周仍威震四方，聯儲局上周調高息口預測後，本周幾位儲行行長主張提早加息，加上歐洲和中國經濟唔爭氣，美滙指數昨日升至85.48的四年新高，歐元連1.27亦穿埋，創22個月新低，美元兌日圓曾抽上109.37，與上周五的六年新高近在咫尺。由於市場越益擔心中國經濟欠佳打擊原料需求，商品貨幣首當其衝。
彭博追蹤的18隻主要貨幣，紐元、加元和澳幣都跌逾1%，表現包晒大艇，紐元最慘情累挫2%，跌至79.44美仙，創一年新低，主因係該國央行行長指當地奶類產品近期顯著回落，紐元滙價仍然強得離譜，重申不排除入市干預。
鐵礦石價格近日跌至五年低位，姊妹貨幣澳洲紙亦唔好得幾多，昨日低見87.92美仙，係七個月最弱，同幾個月前紐元表現最標青完全係兩個世界。
美元係聯儲局明年加息主題下，短期最多只會大漲小回，短期兌日圓若升至110恐遇阻力，要博反彈首選還是英鎊。
奇兵
本欄逢周五刊登