大市連跌多日，仍未見有顯著見底回升之勢，而喺過去嘅半個月調整期，細價股就炒到如痴如醉。直至噚日中國天然氣（931）洩漏毒氣事件而走咗轉火警，事實上有個別股份嘅市值已炒過咗龍，最終都係抵抗唔到地心吸力。
不過，大市又彈唔起，細價股始終都係資金嘅炒作對象。不過，識炒，一定揀啲細市值同埋有現金嘅股！就噚日嚟講，就算毒氣四散拖累其他股仔洗太平地之際，有隻股表現依然硬淨，此股叫做卓高國際（264），隻股噚日有本事逆市創新高，尾市守得住高位，應該可以望多眼。
該股最新市值只有2.86億元，絕對係主板中數一數二細粒嘅公司，卓高主要做分銷皮具、時尚服飾同埋皮革配飾零售，截至今年3月底，公司無債，淨現金有1.7億元，而且喺尖沙咀有好多舖位，相當穩健。不過，呢個唔係賣點，重點係公司上市11年，業績唔多掂，差唔多年年蝕，而那邊廂主席又成日增持，單係今年上半年就已經增持咗七次，有啲嘢囉，有賣殼嫌疑！係咁意加返個主板殼價5億元銀上去，隻股絕對有權升返倍幾兩倍，現價追入值博率高。
古道祥
本欄逢周五刊出