思捷環球（330）挖走Zara管理層、宣佈推行新轉型計劃，至今已逾一年。公司今年7月推行新營運模式，縮短製作流程，又加設補貨機制，如一切運作順利，應可顯著增強思捷競爭力，以後少啲「賣剩蔗」，唔使成日做大減價。另外，思捷快速時裝部門「Trend Division 」（TD），今年亦會開始擴大營運規模，為Main line設計fast-to-market產品，去年TD只佔公司整體銷售約10%，未來這佔比希望以倍增加。
顧客要睇到整個新model運作下出產的貨品，需等到明年1月。不過，去年11月才上任、來自Zara女裝部的思捷新設計總裁，他首批collection主要會率先在今個秋冬登場。到底Esprit能否「飛甩老土」，脫胎換骨，大家或可提前睇到一些端倪。
驟眼睇，思捷最新業績扭虧，兩年來首次錄得淨現金流流入，形勢似乎向好。但思捷仲未稱得上是「脫險」。公司銷售連跌了N年，過去三年間收入銳減近三成。最近一年，思捷亞太區業務簡直好似「倒水」咁，每個市場營業額都跌逾一成；而人人說是「增長引擎」的中國，批發業務生意更加唔見左一半！呢種跌勢非常駭人，完全是「後欄着火」格局。怕且思捷團隊改革供應鏈已分身不暇，根本無時間去其他市場救火。
若公司唔盡快穩定自身生意，恐怕革命他朝成功，思捷在亞太區已流血不止。淨係攬住個經濟長期疲弱、發展成熟的歐洲？前景會有幾好？
海迪