前校長講咗一句：「Who cares」，激起過萬新舊同學周一齊集烽火台，連小弟部份畢業多年嘅舊同學亦帶埋仔仔出席，支持一眾師弟妹，可惜小弟要返工，唔係都返想去行吓，順便食吓久違了嘅Med Can檸檬批。
講開「Who cares」，季初韋斯咸一直都話想炒艾拿迪斯（圖），坦白講，如果我係大儍，我真係向管理層答一句：「Who cares」。以槌仔幫上季五癆七傷嘅陣容，槍頭安祖卡路爾傷多過踢，靠住路蘭、達寧呢班兵都仲排到第13，咁嘅成績槌仔幫管理層仲唔收貨？唔通想似愛華頓踢歐洲賽先滿意。而且以大儍嘅資歷，英超邊支中下游球隊唔想搵佢，韋咸炒佢？佢老哥可能多謝都嚟唔切，收番份解約費又可出教新工。
大儍今夏執靚個陣後更唔愁降班，雖然厄瓜多爾前鋒安拿華倫西亞使咗佢1,300萬歐元，前線威脅大，大儍亦深知中型班最緊要防守，加入塞內加爾中場高耶迪同喀麥隆國腳桑治呢對非洲防中組合，破壞力同活力排英超前7。當然，人總係貪心，韋斯咸快將入主倫敦奧運嘅主場館，高層要威衝吓歐洲賽情有可原，但大儍深知歐洲賽對中型班係糖衣陷阱，之前帶保頓都領教過，所以都係專心踢番本土賽先最醒。
文：牽牛