上帝要你滅亡，必先要你瘋狂！這句說話用喺股票市場，特別貼切。新一代神股中國天然氣（931）上月由七毫子起步，炒到噚日最高見三蚊，短短一個月升足三倍，幾乎邊個位買都贏。近期更日日打入十大成交榜，散戶瘋狂程度可想而知。
既然iPhone6都可以跌穿成本價，一隻市盈率炒到過千倍嘅股，當然難敵地心吸力。兩點後展開大屠殺，最多喪插七成，認真恐怖。其實近期散戶炒中國天然氣嘅狂態，同全城抽iPhone嘅熱潮似到十足十—見到有快錢執，個個金睛火眼狂㩒F5，花盡心思計人頭搵地址去抽，點知炒風一瞬即逝，仲要離譜到跌穿成本價，大家就嚟個華麗轉身，鬥快cut單，務求將蟹貨盡快脫手。
亞洲聯網含金量高
馬後炮式講番呢隻股幾個瘋狂現象畀大家聽︰有喺某大財經網站做嘅戰友講，中國天然氣最近成為最多網民搜尋嘅股份之一，同騰訊（700）、滙控（005）齊名，癲！最近同波友切磋，臨走前竟然有人講冧巴（我哋絕少提及股票），講嘅正正就係931！有黑仔戰友輸多贏少，最近繼續敗北，務求一鋪翻身，就成為咗中國天然氣嘅粉絲之一！
細價股係咪炒完？短期氣氛肯定會受影響，但市場對殼嘅需求絕不會因個別事件減退，吸納有實力嘅股份準沒錯，亞洲聯網（679）噚日逆市企穩，點解？手頭淨現金有2.3億銀，市值只得3.4億銀，含金量接近七成，絕對係逢低吸納之選。
唐牛
https://www.facebook.com/tongcow88