玖龍紙業（2689）董事長張茵向來鍾意着到靚一靚見記者，戴鑽石戒指耳環、藍寶石頸鏈閃爆全場，對呢位中國前首富嚟講真係「濕濕碎」。不過，佢噚日嚟香港出席業績會時，身上配飾「閃令令」嘅程度大幅縮水，唔知係唔係玖紙業績麻麻，要慳啲使。
張茵噚日着住套深藍色衫出席業績記者會，雖然都有「三寶」：耳環、戒指同頸鏈，但「爆閃」程度真係同以前差好遠，條鑽石鏈幼咗不特止，耳環同戒指唔細心睇，幾乎睇唔出。比較返2008年時，張茵戴住成個五蚊銀咁大粒嘅藍寶石頸鏈、鑽石耳環同戒指，唔使開閃光燈都夠照，今時今日真係差好遠。
今年跌至富豪榜30位
呢位曾經嘅中國首富，2006年時公司嚟香港上市，玖紙食住中國概念股價大升，令張茵嘅身家水漲船高，以270億（人民幣．下同）身家榮登中國首富。不過，近幾年中國經濟放緩，製紙業產能過剩，玖紙股價亦跌返晒，今年胡潤百富榜張茵已經跌到落30位，身家約290億，同首富馬雲差距達1,200幾億。
華華問張茵呢位中國前首富，點睇馬雲呢位新首富。張茵好厚道咁講，恭喜馬雲「當選」，佢感到好高興，個人仲會考慮買阿里股票支持吓。佢又話馬雲成為首富，反映中國電子商貿發展蓬勃，而電貿咁發達會帶挈埋包裝行業，咁市場對玖紙嘅需求又會上升喎。咁都抽到水！
李華華
mailto:[email protected]