報載三星Note 4快出爐，場內AV Concept（595）作為三星電子影像傳感器獨家分銷商，呢鋪有計。又AV Concept揸住手遊公司，仲等分拆上市，增值分分鐘啖啖肉。
喺AV Concept一踏入新財政年（3月結），手機出貨資料靚仔到不得了。綜合資料，今年第二季，全球智能手機出貨2.95億部，增加23%，三星繼續做一哥，出貨7,430萬部，而祖國手機，好似華為出貨量，就幾乎翻一番到2,030萬部。
食正半導體分銷業旺潮
AV Concept係三星電子影像傳感器獨家分銷商，加埋集團食住祖國低檔次手機熱，開埋呢瓣市場，半導體分銷業旺潮食到應一應，今年肥仔水。
AV Concept上年純利大倒退64%，得335萬元，查實包括半導體分銷呢啲持續經營業務溢利，係增長咗14%，到5,640萬元。就係因為耳機業務見紅5,305萬元，搞到冇運行。
不過，集團已經將呢瓣撇減乾淨，唔使再拖住日後業績。又好似上邊講，食住手機大熱，AV Concept今年業績應該靚仔。唔好計多，全年純利keep番5,650萬元，預測PE由家陣116倍，跌到得8.2倍。
又AV Concept手執Koocell同Me2on兩間手遊公司。市值得4.6億元，PB得0.65倍，場內手遊股博雅（434）64億元市值、4倍PB，雲遊（484）1.2倍PB、市值21億元，第一視頻1倍PB、近30億元市值。市場仍然畀到手遊股好高價值。
諗到係，AV Concept只要一分拆，增值隨時肥過肥仔水。就算唔計呢條數，AV Concept翻半番到0.97元計，PB亦僅得1倍，剛啱先追到第一視頻，市值得7億銀，手遊股，仲係好細奀。
錢雋
細價股專家
本欄逢周二、三、五刊出