【本報訊】熱炒股仔中國天然氣（931）一個月內股價累升3倍，有本地報章質疑其業務不足以撐起公司逾300億元市值，員工人數僅得8個，公司昨股價瀉37%，成第二大活躍港股，大股東兼主席簡志堅嬲到要見數間本地媒體，「驚你哋搵我唔到以為我走佬」，又稱自己昨日無沽貨。
記者：郭曉琳 黃尹華
中國天然氣於昨午開始插水，最多跌70%，收市仍跌37%，市值單日蒸發近百億元，成交額僅次盈富基金（2800）。高位接火棒的散戶肯定怨聲載道，簡志堅聞言火滾：「接乜火棒啫？我幾年冇賣過隻股票，從中冇得益」。
他認為《香港經濟日報》周四報道製造機會予沽空機構圖利，「我唔敢講個報道係咪專登製造恐慌，冇貨嘅就可以沽空賺錢」。惟9月以來，該公司平均沽空佔成交量不足1%，最高亦只有1.9%。
澄清員工非8人 現逾30人
公司股價近月爆升，簡志堅表示無法控制，「我就好老實，冇買賣股票幾年」。又認為近日公司成交量驚人，因受世界各地投資者追捧，「成交量仲高過QQ（騰訊，700），香港散戶邊有咁多錢」。他深信公司的發展受認同，「升咁多都繼續追，就係信你」。
外界質疑一間要發展液化天然氣的公司，必然要有氣源、氣站及實質資產支持，惟年報披露公司員工人數只得8個人，何以有能力發展能源業務？簡回應，「年報同今時今日嘅變化好大，我哋𠵱家有三十幾人」。記者反問他會否將更新日後年報資料，他卻說：「唔一定要咁做，幫我地做嘢嘅顧問身家多到嚇死你，唔係計人數」。
他表示現時不能披露與哪間國家大企業買氣合作，「我想幫中國打造藍天白雲，如果我乜都冇，政府點會同我簽協議。公司在3月宣佈與中海油（883）雲南公司合作建加氣站，共投資2億元人民幣。其後又陸續公佈與當地大型國企在江蘇、內蒙等地開展天然氣業務，覆蓋7個城市」。不過協議內容就未有提及投資金額和時間表。
中燃回應：發展冇佢份
簡志強過往擅於買賣殼股，2007年他收購中國天然氣前身「宏通」75%股本時，每股價格僅0.0386元，如今股價已翻了逾百倍，任何價位沽貨都無得輸。他亦不排除未來會出售中國天然氣，「你問我將來嘅嘢，Who is to say（誰說得準）？乜嘢都有價錢」。
10年前簡志堅低價獲批中國燃氣（384）購股權，賺錢贏名氣。提到他與中燃，他斷言「如果當年我唔幫唔借錢畀佢，冇簡志堅，就唔會有384今日」。記者問借了幾多錢，他說：「唔好講喇，我唔係一個埋怨人嘅人，我係一個虔誠嘅基督徒」。中燃高管回應本報表示：「冇咁嘅事」，又指「中燃管理層從冇這個人，中燃發展與他冇關」。
簡期望將中國天然氣打造成另一間中燃，「目標要引入策略性股東，幾年內要打入恒指」！惟對於報道指他曾透露將引入新加坡主權基金，他神秘地說：「未成事嘅嘢我唔講得住」。
【中國天然氣主席簡志堅金句】
「年報同今時今日嘅變化可以好大，你係咪應該畀個機會我澄清？」
「我唔敢講個報道係咪專登製造恐慌，畀機會基金從中獲利」
「冇簡志堅，就唔會有384（中國燃氣）嘅今日」
「如果經歷到動盪，個股價都企得穩，就證明股民嘅眼光係雪亮」
【網民洗版】
香港網民火焰兄：
上面風捲殘雲式殺落嚟隊冧晒老散，再由低位狂風掃落雨掃平貨，恐怖！
香港網民Sheeep：
黐線，（中國天然氣）今朝（昨日）破3蚊創新高，𠵱家1蚊都穿埋。
內地網民kcots：
這件事給我的啟示是，對於莊家，去拉升一支股票，至少要潛伏2、3年時間。