日前喺罷課集會「公民講堂」一上台，即刻受到台下學生歡呼嘅社民連「毛主席」長毛，日前一篇有關佢「考慮下屆棄選」嘅報道出街後，即時收到唔少粉絲同黨友查詢，問毛主席究竟為乜對立法會意興闌珊？粉絲心碎了，長毛親自闢謠派定心丸，佢話香港火燭緊，救火行先，點會仲諗選唔選？
長毛噚日同八方講，篇報道其實「搞錯咗」，澄清當日冇講過「考慮下屆棄選」，而只係話「邊得閒諗下屆選唔選」，估計個記者「聽唔清楚」而惹嚟美麗的誤會。佢話呀，𠵱家最重要嘅問題，唔係兩年後嘅立法會點選，而係目前呢個政治亂局下，大家應該做啲乜？諷刺話有人仲討論立法會來屆係咪五區變九區，認真嘥時時間，「現時（香港）火燭吖嘛，仲講乜嘢間個客廳出嚟？」
八方都覺得喺建制派妖孽當道、狼英搞到香港處處火頭之時，長毛梗係要留守幫手救火！若然狼英連任，長毛更加唔可以走人㖭呀！
研究係咪辭職啟動公投
長毛就話喎，𠵱家連下屆係咪再選都唔得閒諗，因為佢諗緊10月底至11月初係咪要同泛民辭職啟動五區公投。至於佢係咪定辭職？長毛話希望先同泛民傾吓，亦要先得到社民連行政委員會以及得到其後召開嘅會員大會通過後，先可能成事。佢話查實對做唔做議員睇得好閒，因為無論喺議會內定外，自己都一定會繼續抗爭，大家可以放心！
李八方
mailto:[email protected]